Presidenti Ilir Meta ka zhvilluar sot një takim me një delegacion të Komitetit Hebreo-Amerikan me qendër në New York, të kryesuar nga Drejtori i tij Ekzekutiv, zoti David Harris.
Në këtë takim Meta njohur zotin Harris me situatën aktuale në Shqipëri. Ai i parashtroi atij edhe propozimin për zgjidhjen e krizës kushtetuese dhe institucionale nëpërmjet zhvillimit të tri palë zgjedhjeve më 13 tetor 2019: zgjedhjeve vendore, parlamentare dhe të Presidentit nga populli.
“I vetmi ilaç që shëron vendin nga kjo krizë e thellë përfaqësimi dhe legjitimiteti është vetëm respektimi i votës së lirë dhe direkte të të gjithë qytetarëve shqiptarë, dhe pranimi i verdiktit të tyre final nga të gjithe ne”, u shpreh Meta.
Ndër të tjera Meta e siguroi kreun e delegacionit që miqësia mes shqiptarëve dhe komunitetit hebreo-amerikan do të vazhdojë të forcohet, dhe se bashkëpunimi ekonomik duhet të intesifikohet më tej.
Nga ana tjetër Harris vlerësoi rolin e shqiptarëve në mbrojtjen e hebrenjve gjatë Luftës së Dytë botërore dhe premtoi angazhim më të madh për të ndihmuar në rritjen e rolit të diasporës shqiptare në SHBA.
“Miqësia tradicionale e Shqipërisë dhe e kombit hebre është e skalitur në kujtesën tonë kombëtare jo vetëm për rolin fisnik të shqiptarëve në shpëtimin, mbrojtjen dhe strehimin e hebrenjve gjatë Luftës së Dytë Botërore, por dhe për historitë tona të ngjashme si dy popuj që kanë vuajtur përgjatë shekujve të ekzistencës së tyre”.
“Ne vijmë këtu me ndjenjën e mirënjohjes së përhershme për popullin shqiptar, dhe do të jemi përjetësisht së bashku për të përballuar sfidat edhe në të ardhmen. Jemi gjithashtu të gatshëm të ofrojmë mbështetjen tonë për të rritur rolin e diasporës shqiptare në SHBA, me qëllim që të ndikojmë për çështjen shqiptare në politikën dhe administratën amerikane.” u shpreh Drejtori Ekzekutiv David Harris.
David Harris ka udhëhequr AJC-në që nga viti 1990. Ai është përshkruar nga ish-presidenti i izraelit Shimon Peres si “ministri i jashtëm i popullit hebre”. Duke qenë se drejton një nga organizatat më të vjetra për mbrojtjen e hebrenjve në SHBA ai është ftuar të flasë në disa nga forumet më prestigjioze në botë. /Opinion.al
