Dy negociatorët nga Partitë Popullore Evropiane Knut Fleckenstein dhe David McAllister do të zhvillojnë takime të ndara me liderët politikë në vend.
Kështu, përfaqësuesi dhe eurodeputeti McAllister po zhvillon një takim me kreun e Partisë Demokratike Lulzim Basha, ndërsa Fleckenstein takohet me kryetarin e Kuvendit, Meta si dhe me kryeministrin Rama. Të dy takimet po zhvillohen në Pallatin e Kongreseve.
Në takime mësohet se do të jenë edhe dy ambasadorët, ai amerikan Donald Lu dhe ajo e BE-së, Romana Vlahutin.
Të njëjtat burime nënvizojnë se do të diskutohet mbi mundësinë për dialog mes palëve. Theksohet, se opozita i qëndron kërkesës për qeveri teknike dhe mandatin e saj për të siguruar zgjedhje të lira e të ndershme.
