Kreu i opozitës Lulzim Basha deklaroi sot nga Shkodra se kriza është shkaktuar nga bashkëpunimi i politikës me krimin dhe mund të zgjidhet vetëm nga prishja e këtij bashkëpunimi.
Basha tha se janë dhjetra kandidatë socialistë për bashkitë që kanë rekorde kriminale dhe për këtë kryeministri Rama nuk ka dhënë asnjë përgjigje akoma.
“Me dhjetra kandidate me rekorde kriminale. As Edi Rama dhe organizata e tij kriminale nuk kanë përgjigje për vendin dhe as për Shkodrën. Vendi ndodhet në udhëkryq delikat dhe kritik sa i përket ekonomisë dhe fatit të integrimit evropian të vendit. Ndaj ne si opozitë, PD dhe aleatët, të bashkuar kemi përgjegjsinë ti japim shqiptarëve zgjidhjen që meritojnë për zgjidhjen e krizës. Ajo është prodhuar nga bashkëpunimi i politikës dhe krimit dhe mund të zgjidhet duke e ndarë atë nga krimi. Proces zgjedhor pa garancinë se qytetarët nuk do të dhunohen, pa një transformim të thellë, nuk mund të ketë. Do të vazhdojmë betejën deri në fund për të çliruar Shqipërinë nga politika e lidhur me krimin” tha Basha.
Kryetari i Partisë Demokratike foli gjithashtu për faktorët ndërkombëtarë që po ndërmjetësojnë për zgjidhjen e kësaj krize por për herë të parë ai tha se zgjidhja do të vijë nga brenda.
“S’ka zgjidhje nga jashtë. Zgjidhja do të vijë nga brenda. Jashtë kemi pasur miq, por kjo krizë nuk zgjidhet duke bërë viktimën apo duke parë nga qielli. Zgjidhet duke marrë në dorë fatet tona” deklaroi Basha. /Opinion.al
