“Kjo betejë nuk ka nisur ik ti, se do vijë unë”… Ishte kjo deklarata e kreut të PD-së, Lulzim Basha pas një takimi me aleatët në selinë blu për të vendosur për aksionin opozitar.
Basha tha se aksioni opozitar nuk ka nisur vetëm për largimin e Edi Ramës si kryeministër, por për një reformë politike, zgjedhore dhe ekonomike.
“Prioriteti jonë është t’i japim fund kësaj gjendje duke vendosur demokracinë dhe legjitimitetin. E vetmja rrugë janë zgjedhjet e lira dhe të ndershme me një qeveri tranzitore, që do të thotë se PS-ja duhet të marrë përgjegjësitë ku e ka katandisur vendin në drejtimin e kryepërgjegjësit, që duhet të largohet, nuk ka zgjidhje tjetër. Ndodhemi para një momenti kyç jo për atë që ka ndodhur por për atë që pritet që të ndodhë. Në më pak se një muaj e gjysmë KE do të gjykojë për negociatat. Negociatat nuk kanë shans të hapen me një Shqipërinë që nuk bën dot zgjedhje të lira dhe të ndershme. Ne kemi diskutuar për përgjegjësitë tona karshi shqiptarëve. Në respekt të këtyre përgjegjësive sikur kemi hedhur disa hapa, jemi gati të ofrojmë edhe një propozim apo platformë kombëtare për daljen e vendit, hapat që duhet të hidhen për daljen nga kriza. Duhet të kemi hapa të vendosur, ndryshime të thella politike, reformë të thellë zgjedhore dhe ndryshime të thella sa i përket shtetit të së drejtës”, tha Basha.
Herët në mëngjes, duke komentuar raportin e OSBE-së, kryeministri Edi Rama bëri ftesë për dialog por vetëm për reformën zgjedhore. / Opinion.al
