Kreu i LIBRA-s Ben Blushi është i ftuar sot nga 18 ambasadorët e Bashkimit Evropian në Tiranë gjatë një takimi të veçantë që do të zhvillohet për situatën dhe zgjidhjen e krizës politike në vend.
Ben Blushi ka paraqitur një plan me 8 pika për zgjidhjen e ngërçit zgjedhor si dhe për ecurinë e reformës në drejtësi.
Propozimi përfshin monitorim më të madh të zgjedhjeve, të veprimtarisë së policisë dhe të procesit të zgjedhjes së presidentit.
Opozita ka bojkotuar prej më shumë se një muaji punimet e Kuvendit, ndërsa vijon protestën në çadrën e ngritur para godinës së Kryeministrisë, ku kërkon qeveri teknike për të siguruar zgjedhje të lira dhe të ndershme.
Kohë më parë ambasadorët janë takuar me kryeministrin Rama dhe kreun e opozitës, Lulzim Basha.
