Gazetarja filipinase, Maria Ressa, shefja ekzekutive e një faqeje që kritikon presidentin, Rodrigo Duterte, është dënuar për shpifje, në një rast që është konsideruar test për liritë e mediave në këtë shtet.
Gjykata në Manila ka shpallur fajtore Ressan dhe gazetarin tjetër, Reynaldo Santos Jr, duke i dhënë dënim me gjashtë vjet burgim.
“Ne do të ngritemi kundër secilit sulm kundër lirisë së mediave”, ka thënë Ressa pas vendimit, duke u zotuar se do ta vazhdojë luftën.
Dy të dënuarit janë liruar me kusht, në pritje të vendimit të Gjykatës së Apelit. Sakaq, grupet për liri të shprehjes e kanë përshkruar këtë rast si të motivuar politikisht, me qëllim të heshtjes së kritikëve të qeverisë.
Ky rast lidhet me një artikull të publikuar më 2012, në faqen e saj në internet, Rappler. Në këtë artikull, që është përditësuar më 2014, është cituar një raport i inteligjencës, që lidh një biznismen, me vrasje dhe trafikim të njerëzve dhe drogës.
Artikulli është publikuar para miratimit të një ligji për shpifje në internet, mirëpo prokurorët kanë argumentuar se ndryshimet e bëra më vonë nënkuptojnë se Ressa mund të dënohet./Opinion.al
