Para disa ditësh presidenti i Shteteve të Bashkuara të Amerikës, Donald Trump, pati një takim të tensionuar me homologun e tij nga Afrika e Jugut, Cyril Ramaphosa në Shtëpinë e Bardhë. Trump e vuri me “shpatulla pas muri” presidentin afrikano-jugor pas akuzave për “gjenocid” ndaj të bardhëve.
Por ka një problem! Disa nga pamjet që iu referua kreu i shtetit amerikan ishin gabim.
Siç bën me dije agjencia e lajmeve, Trump tregoi një pamje nga një video e Reuters, e xhiruar në Republikën Demokratike të Kongos dhe e paraqiti gabimisht si “provë” për vrasje masive të fermerëve të bardhë në Afrikën e Jugut.
“Janë të gjithë fermerë të bardhë që po varrosen”, tha Trump, duke treguar një artikull me foto.
Në të vërtetë, videoja që Reuters publikoi më 3 shkurt, tregonte punonjës humanitarë duke ngritur trupa të vdekur në qytetin Goma të Kongos. Pamja ishte marrë nga një xhirim i Reuters pas luftimeve të përgjakshme me rebelët M23 të mbështetur nga Ruanda.
Artikulli që Trump i tregoi Ramaphosa-s ishte publikuar nga faqja konservatore amerikane American Thinker dhe fliste për konfliktet dhe tensionet racore në Afrikën e Jugut dhe në Kongo.
Artikulli nuk e shpjegonte foton, por e quante “pamje nga YouTube” dhe përfshinte një link të një raporti për Kongon që përdorte videon e Reuters.
Shtëpia e Bardhë nuk komentoi për rastin. Andrea Widburg, redaktore në American Thinker dhe autore e artikullit, i tha Reuters se Trump “e kishte ngatërruar imazhin”.
Megjithatë, ajo shtoi se artikulli kishte synuar të theksonte “presionin në rritje ndaj të bardhëve në Afrikën e Jugut” dhe kritikonte qeverinë e Ramaphosa-s si “të paaftë dhe të fiksuar pas racës”.
Videoja nga e cila u mor pamja tregonte një varrim masiv pas një sulmi të M23 në Goma, filmuar nga gazetari i Reuters, Djaffar Al Katanty.
“Atë ditë ishte shumë e vështirë të hynim për të filmuar… M’u desh të negocioja me rebelët M23 dhe të bashkëpunoja me Kryqin e Kuq për të marrë leje”, tha Al Katanty.
Ai shtoi se e kishte përjetuar si tronditje kur pa Trump duke mbajtur artikullin me pamjen nga videoja e tij.
