Teksa kritikoi Bashkimin Europian për mosliberalizimin e vizave për Kosovën dhe ironizoi ndërkombëtarët për deklaratat e tyre ndaj aktakuzave ndaj presidentit Hashim Thaçi, kryeministri Edi Rama theksoi dhe njëherë që Kosova duhet të jetë pjesë Shengenin Ballkanik.
Rama foli gjatë konferencës të përbashkët për mediat me kryeministrin e Kosovës Avdullah Hoti. Rama tha se Shqipëria dhe Kosova duhet të jenë bashkë në këtë tryezë.
“Patjetër që unë nuk kam se si të ndryshojë mendim lidhur me domosdoshmërinë që ne të jemi bashkë, Shqipëria dhe Kosova, edhe në tryezën e Shengenit Ballkanik, i cili nuk është një alternativë e integrimit tonë në BE, por krijimi i një hapësire të përbashkët, ndërkohë që ne përpiqemi të hyjmë në BE, duke shfrytëzuar potenciale të pashfrytëzuara. Kur flasim për potenciale të pashfrytëzuara, kush i bie ndesh kësaj iniciative vrapon ta karakterizojë si një iniciativë që lidhem me interesat e Beogradit, ndërsa unë qëndroj te interesat e shqiptarëve dhe te interesi strategjik i ynë. Ne kemi një potencial shumë të madh të pashfrytëzuar me Kosovën dhe si mund ta bëjmë këtë? Duke vendosur në themel të këtij bashkëpunimi 4 liritë e BE-së: Lirinë e lëvizjes së njerëzve, lirinë e lëvizjes së mallrave, të shërbimeve dhe të kapitaleve”, u shpreh Rama./ Opinion.al
