Bisedimet për ndryshimet klimatike në Konferencën Botërore të Klimës që po mbahet në Madrid, janë bllokuar të shtunën pa arritjen e ndonjë marrëveshjeje.
Ministrja e Mjedisit të Kilit, Carolina Schmidt, që kryeson bisedimet dyjavore në Madrid, iu ka bërë thirrje përfaqësuesve të rreth 200 shteteve që të pajtohen me marrëveshjen e propozuar.
“Ne duhet t’i tregojmë botës përpjekjet tona”, tha ajo.
Por, grupet ambientaliste kanë shprehur pakënaqësi nga propozimet e dhëna, duke theksuar se ato rrezikojnë mosrealizimin e përkushtimit sipas marrëveshjes së vitit 2015 në Paris.
“Unë kam marrë pjesë në negociatat për ndryshimet klimatike që nga fillimi i tyre më 1991, por nuk kam parë kurrë mos përputhje totale si këtu në Madrid, duke u bazuar në atë çfarë kërkohet me shkencë dhe asaj se çfarë po bëjnë negociatorët”, tha Alden Meyer, një nga politikbërësit në Bashkimin e Shkencëtarëve që merren me këtë çështje.
Meyer theksoi se ky propozim nuk reflekton paralajmërimet urgjente nga shkencëtarët se emetimet e gazit duhet të zvogëlohen dukshëm dhe sa më shpejtë, për të arritur mbajtjen e ngrohjes globale në 1.5 gradë celcius deri në fund të shekullit.
“Planeti po përfshihet nga zjarri dhe hapësira jonë që na mundëson ta shpëtojmë po bëhet vështirë e arritshme për shkak të vonesave në ndërmarrjen e masave”, tha Meyer.
Pakënaqësitë për ndryshimet klimatike kanë rezultuar me protesta të shumta nëpër botë. /Opinion.al
