Kandidatja e vetme për postin e shefes së Fondit Monetar Ndërkombëtar është Kristalina Georgieva nga Bullgaria.
Drejtuesja e mëparshme Christine Lagarde mësohet se ka dhënë dorëheqjen nga ky post për të marrë drejtimin e Bankës Qendrore Evropiane.
Tashmë kandidatura të tjera për këtë post nuk do të pranohen dhe bordi ekzekutiv i FMN-së do të realizojë intervistë me Georgievan. Ajo ka shërbyer nga viti 2017 si zyrtare kryesore ekzekutive në Bankën Botërore.
Synimi i bordit të FMN-së është të emërojë pasardhësen e Lagardes deri më 4 tetor. Lagarde do të largohet zyrtarisht nga pozita e shefes së FMN-së të enjten.
Që nga formimi i Fondit Monetar Ndërkombëtar dhe i Bankës Botërore, menjëherë pas Luftës së Dytë Botërore, FMN-ja gjithmonë është drejtuar nga një shtetas evropian, ndërsa Banka Botërore nga një shtetas amerikan.
