Deputeti demokrat, Ervin Salianji gjatë seancës plenare të mbajtur në Parlament ka sulmuar kryeministrin Edi Rama dhe ministrin e Brendshëm Bledi Çuçi.
Duke marrë shkas nga ngjarjet e fundit që kanë goditur vendin, siç ishte dhe rasti i sulmit ndaj Top Channel, Salianji thekson se në një kohë kur qytetarët ndjehen të pasigurt, duhet që kryeminstri dhe ministri i Brendshëm ta lënë luftën e rrjeteve sociale dhe të vijnë në Parlament për të diskutuar.
Sipas tij as drejtori i Policisë nuk është paraqitur në komision për të dhënë shpjegime.
“Duke qenë se në çdo rrugë, qytet, institucione që nuk mund të preken si media, ka shpërthyer dhuna… kemi ndonjë risk ne që vijmë në punë apo nisemi nga parimi që nuk bie rrufeja në Parlament?
Në kushte të tilla të degradimit të rendit dhe sigurisë publike, dhe ku qytetarët ndihen të pasigurt duhet që kryeministri dhe ministri i Brendshëm ta lënë luftën nga twitteri dhe të vijnë këtu. Është seanca e parë pas ngjarjeve të pandodhura në vend dhe ata nuk paraqiten, ashtu si dhe drejtori i policisë nuk paraqitet në komision për të dhënë shpjegime”, tha ai.
