Alba Cenko, është gruaja e 15-të e vrarë brenda këtij viti në Greqi. Ngjarja e rëndë ndodhi në Ampelokipi, të Athinës. 32 vjeçarja u vra me çekiç nga bashkëshorti i saj Kastriot Cenko dhe trupi iu fsheh për një javë në papafingon e shtëpisë.
Ka qenë vetë 39 vjeçari që ka telefonuar policinë të enjten e 5 dhjetorit 2024 për të njoftuar për krimin e kryer një javë më parë, 29 nëntor.
Sipas burimeve policore, krimi ndodhi në apartamentin e çiftit në katin përdhes. Bashkëshorti ka pranuar krimin të cilin e ka kryer pasi ishte I verbuar nga xhelozia pasi gruaja kishte marrë një telefonatë nga një shok i tij. Pas krimit, trupin e viktimës e mbuloi me çarçaf dhe e fshehu në papafingo.
Dy fëmijët e çiftit, 9 dhe 12 vjeç, ndodheshin në banesë në momentin kur ndodhi krimi, por po flinin. Të nesërmen në mëngjes, kur u zgjuan për të shkuar në shkollë, kërkuan nënën e tyre, ndërsa babai u tha se ajo ishte nisur për në punë. I ka çuar në shkollë, ndërsa më vonë i ka marrë dhe i ka çuar në shtëpinë e motrës.
Sipas të njëjtave informacione, kur policia ka mbërritur pasditen e djeshme në rrugën 19 Lakonias pas telefonatës së 39-vjeçarit, ka gjetur autorin së bashku me dy fëmijët e tij, 9 dhe 12 vjeç, në hyrje të pallatit, ku dhe u arrestua.
Më pas ai është dërguar në komisariat, për tu marrë në pyetje për të rrëfyer krimin e tij. Ndërsa fëmijët e çiftit tani janë në shtëpinë e dajës, shkruan gazeta greke zougla.
