Hetimet mbi vrasjen e dyfishtë, të Jonida Çanakut dhe Sokrat Shanit vazhdojnë. Edhe pse autori është vetëvrarë, pasi ka pranuar krimin e vrasjes së 27vjeçares, duke lënë tre letra të shkruara, si provën më të fortë materiale, Prokuroria e Lushnjes po kryen disa veprime të tjera hetimore.
Organi i akuzës, ka marrë në pyetje personat e të dy familjeve. Ata kanë pranuar se kishin dijeni për lidhjen e dashurisë midis dy viktimave prej disa vitesh, një lidhje e cila vazhdoi pa miratimin e asnjërës prej familjeve.
Burime nga prokuroria bëjnë me dije se, ndonëse autori i krimit, Sokrat Shani, ka përshkruar ngjarjen në tre letrat e lëna përpara vetëvrasjes, hetimet janë zhvendosur edhe në një tjetër pistë, atë të një lidhjeje paralele të 27 vjeçares.
Dyshimet janë se Sokrat Shani ka kryer vrasjen, pasi nuk ka pranuar lidhjen e Jonidës me një djalë tjetër. Prokuroria e Lushnjës është duke punuar për gjetjen e këtij personi, për të zbardhur krejtësisht ngjarjen. Sokrat Shani dhe Jonida Çanaku, prej më shumë se tre vitesh ishin në një lidhje intime me njëri tjetrin.
Njohja e tyre, ka nisur për shkak të ndihmës që autori i vrasjes i jepte në bujqësi familjes së viktimës. Mbjellja e serave në Kryekuq, ku jetonte familja e vajzës bëhej nga Shani falas, pasi kishte biznesin e fidaneve bujqësor. Në 15 Gusht të këtij viti, në një apartament në Golem të Kavajës, u gjet e vrarë 27vjeçarja Jonida Canaku. Ndërsa Sokrat Shani, u vetëvra në Lushnje. Tv Klan
