Detaje të reja kanë dalë në dritë nga tragjedia makabre e ndodhur ditën e djeshme, në Gjilan. Autorja, Valdete Bllaca e kishte paramenduar dhe përgatitur në përpikmëri skenarin e vrasjes së prindërve, vëllezërve dhe vetes.
Gazeta Sinjali ka mësuar nga burime të sigurta me familjen e polices se një ditë përpara krimit, ajo i kishte dorëzuar tezes së saj, 12 mijë euro.
Në bisedë e sipër, Bllaca mësohet se e kishte pyetur tezen se sa kushtonte një ceremoni varrimi, megjithatë nuk i kishte treguar asaj asnjë detaj se pse po ia linte paratë dhe se ku i kishte marrë ato.
Po ashtu raportohet se Valdete Bllaca pasi ka varë 4 anëtarët e familjes së saj ka qëndruar rreth 4 orë në banesë e vetme mes trupave të tyre. Tezja dhe bashkëshorti i saj kishin shkuar në shtëpinë e familjes, por në derë ishte shfaqur Valdetja, e cila ishte munduar që të fshihte ngjarjen. Ajo i kishte thënë tezes se familjarët nuk ndodheshin në shtëpi, ndërsa ajo vetë ishte pak e zënë.
Pasi ishin përshëndetur me policen dhe po largoheshin, tezja dhe bashkëshorti i saj dëgjuan krismat e dy plumbave që Valdete Bllaca i shkrepi drejt vetes në korridorin e shtëpisë.
Burimet po ashtu kanë bërë të ditur se vëllai i vogël, Fisnik Bllaca u qëllua për vdekje nga e motra, teksa ishte duke fjetur në dhomën e tij të gjumit, kurse babain, Zeqir Bllaca dhe vëllain Blerim Bllaca, ajo i kishte vrarë në dhomën e ndenjes ndërsa, nënën Hanife Bllaca e qëlloi për vdekje në një dhomë tjetër./Opinion.al
