Ersid Curri kreu dje krimin e rëndë të vrasjes së gjyshes 80 vjeçe dhe më pas u vetëvra. Ngjarja e rëndë ndodhi në banesën e tyre në qendër të Durrësit. Nga hulumtimet rezulton se kjo familje ka pësuar një tragjedi të vertete, ku numërohen disa viktima.
Në harkun e dhjetë viteve, në familjen Curri janë vrarë 6 persona për motive hakmarrjeje.
Seria e vrasjeve në këtë familje nisi me xhaxhain e 25- vjeçarit Enkelejd Curri. Ai u vra në një hotel në kryqëzimin e rrugës së Rrashbullit me Shijakun.
Në vitin ‘97, duke shkrehur armën në rruge, ai gabimisht ka vrarë një grua të moshuar, ndërkohë ishte kthyer në një person problematik në qytetin bregdetar të Durrësit.
Dyshohet se ai u ekzekutua në shenje hakmarrje nga familja e të të moshuarës.
Në datën 27 janar të vitit 2010, në një lokal të Durrësit mbetën të vrarë pas ekzekutimit me armë babai i Ersid Currit, shtetasi Luan Curri, dhe kushëriri i tij, Ani Curri. Në këtë ngjarje mbeti i vrarë edhe inxhinieri Edmond Shemsi.
Pas hetimeve rezultoi se shënjestër e kësaj vrasjeje ishte pikërisht Luan Curri. Në dosjen e policisë rezulton se “Rreth orës 22:30 të datës 27.01.2010, në lagjen nr.10 të qytetit të Durrësit, një person i armatosur, (shtetasi Arjan Çelaj), ka hyrë në ambientet e një lokali, në vendin e njohur si ‘Lagjja e Re’ dhe ka qëlluar me breshëri automatiku.
Si pasojë mbetën të vrarë tre persona, ndërsa në lokal në momentin e shkrehjes së armës ndodheshin 9 persona, mes tyre edhe viktimat. Luan Curri dhe nipi i tij, Ani Curri, kanë qenë në një tavolinë, ndërsa shtetasi Edmond Shemsi ka qenë në një tjetër tavolinë, duke biseduar me disa të njohur të tij.
Nga hetimet rezultoi se objektivi ishte Luan Curri, me të cilin autori kishte një konflikt të hershëm”.
Shtatë muaj pas vrasjes së Luan Currit, më 14.08.2010 u vra me një ekzekutim mafioz djali i tij, Mario Curri.
19-vjeçari u vra me plumb në kokë. Ndryshe nga rasti i të atit, ku për vrasjen e tij po vuan dënimin një person, krimi i ndodhur te stacioni i furgonëve të linjës për në Tiranë, ku mbeti i vrarë me plumb pas koke Mario Curri, ka mbetur pa autorë.
7 vite pas këtyre krimeve të rënda, Ersid Curri dhe gjyshja e tij Hurme Curri u gjetën pa jetë në banesën e tyre. Ata rezultojnë të vrarë me armë zjarri. Nga hetimet e para dyshohet se Ersid Curri, 25 vjeç ka vravrë gjyshen për motive ende të panjohura dhe më pas ka vrarë edhe veten.
