Një 74 vjeçare që jetonte e vetme u gjet e pajetë në banesën e saj në fshatin Bërzhitë të Tiranës, e lidhur këmbë e duar. Një ditë më pas, të afërmit kanë rrëfyer se e moshuara ishte grabitur edhe dy vite më parë por policia nuk kishte gjetur autorët.
Siç shihet nga fotot, grabitësit vrasës kanë bastisur shtëpinë duke kërkuar për paratë e të moshuarës. Ata e kanë lidhur këmbë e duar dhe nga asfiksia ka humbur jetën. Trupi është gjetur nga kryeplaku i fshatit i cili kishte vënë re se e moshuara nuk po dilte më të kulloste bagëtitë.
Fatime Hida, 74 vjeçe ishte grua e ve dhe nuk kishte as fëmijë. Sipas të afërmeve, grabitja e para e banesës ka ndodhur në prill 2015, ku i kanë marrë 2 milionë e 400 mijë lekë. Të afërmit thonë se policia nuk bëri asgjë për të zbardhur grabitjen e parë.
E moshuara jetonte me blegtori, ndërsa shtëpinë ia kishte rikostruktuar një fondacion holandez para dy vitesh.
Kryeplaku ka qenë i pari që ka hyrë në banesë dhe e ka gjetur të moshuarën në prag të derës, këmbë e duar të lidhur dhe në kokë e mbuluar me një copë të zezë.
Policia e Tiranës ka shoqëruar në polici 20 persona për tu marrë në pyetje lidhur me vrasjen e të moshuarës në Bërzhitë.
“Nga këqyrja paraprake e kufomës dyshohet vdekja ka ardhur si pasojë e asfiksisë, bllokimit të rrugëve respiratore. Kufoma është dërguar pranë IML për kryerjen e autopsisë nga mjeku ligjor. Po punohet për sqarimin e plotë të rrethanave të ngjarjes, tha policia.
