Kryeministri Rama ka dhënë një intervistë për gazetën italiane ‘Oggi’ ku ka folur për turizmin në Shqipëri, mundësitë që mund të kenë investitorët italianë dhe ka prekur pak situatën politike në vend.
Për zgjidhjen e kësaj të fundit ai u përgjigj vetëm me një fjalë, “të shohim”.
Rama ka argumentuar se turizmi në Shqipëri është në rritje dhe se aty po ndiqet një model zhvillimi si i Italisë.
“Në vitin 2013, kishim 2.3 milionë turistë. Në 2018 ka pasur 6 milionë dhe ne synojmë të arrijmë 10 milion pas pesë vjetësh. Ne na mungon një Leonardo ose Giotto, por ne kemi historinë dhe kulturën tonë për të treguar dhe zbuluar” tha Rama.
Gjatë intervistës kryeministri i përshkroi gazetares se si Shqipëria e sotme i ngjan Italisë së viteve 60, jo vetëm në pamje por edhe në hapat që ata ndërmorën në kohën e modernizimit të vendit. Kjo sipas tij ndodh pasi në Shqipëri ne ndihemi si italianë
“Shqipëria e sotme i ngjan Italisë së viteve 60. Ejani këtu dhe ju do të gjeni italianë e gjyshërve tuaj, të njëjtën mënyrë për të parë me shpresë drejt së ardhmes. Ndoshta do të shihni se sa të mirë jemi, si ju në të kaluarën, në rinovimin e peizazhit. Në një proces modernizimi nuk funksionon gjithmonë gjithçka. Turizmi këtu sjell punë, njohuri dhe hapje ndaj botës. Dhe ne kemi aq shumë për të kopjuar dhe për të mësuar nga Italia. Ndihemi italianë” shtoi Rama
Rama ftoi investitorët italianë të investojnë në Shqipëri sepse sipas tij ne kemi atë që italianët e njohin si taksa e Salvinit, 15% për të nxitur investimet.
Në fund të intervistës Rama dha dhe një koment në lidhje me imazhin e Shqipërisë.
“Ne dëgjojmë shpesh të flasim për Shqipërinë si një vend ku mbretëron krimi i organizuar. Por ky është një imazh që ka prekur dhe prek edhe Italinë. Pra mund të themi se për këtë ne jemi të dytët pas jush “. /Opinion.al
