Ministri i Brendshëm, Bledi Çuçi, në mbledhjen e Këshillit Kombëtar të Integrimit Europian, të mbajtur ditën e sotme tha se lufta kundër krimit të organizuar ka qenë pika qendrore e punës tonë.
Ministri theksoi se Shqipëria është përqëndruar te bashkëpunimi ndërkombëtar dhe te operacionet e përbashkëta me aleatët për “luftën” kundër krimit të organizuar. Sipas Çuçit kjo dëshmon për nivelin e lartë të besimit nga partnerët evropianë.
Ndër të tjera Çuçi deklaroi se Shqipëria ka plotësuar kriteret për t’u berë pjesë e BE pavarësisht ngërçit të krijuar nga vetoja bullgare.
“Nuk e shoh vetëm si raportim normal, por një mundësi për të avancuar më tepër në këtë proces. Shqipëria nuk ka dyshim që do të jetë pjesë e BE. Është në interesin e vendit tonë që kur bëhet fjalë për BE të lëmë mënjanë politikën.
Komisioni Evropian ka thënë se ne i kemi përmbushur të gjitha kriteret, pavarësisht ngërçit që kemi nga vetoja bullgare. Kapitulli 24 dhe 23 mund të konsiderohen si shtylla e procesit të zgjerimit.
Çfarë kemi arritur? Lufta kundër krimit të organizuar, pika qendrore e punës tonë. Krimi i organizuar nuk njeh kufi, nuk ka pasaportë , mund të luftohet vetëm me bashkëpunim të ngushte me partnerët tanë. Ne jemi përqendruar tek mirëbesimi, duke pasur bashkëpunime me vende aleate. Jemi fokusuar e shkëmbimi i informacioneve dhe bashkëpunimin e operacioneve të përbashkëta. Kjo dëshmon për nivelin e lartë të besimit nga partnerët evropian.
Ne kemi shtuar prezencën në Europol. Policia e shtetit është pranuar bashkëdrejtuese në EMPAKT, një platformë për bashkëpunimin e vendeve anëtare për të adresuar kërcënimet nga krimi të organizuar.
Sipas progresraportit Shqipëria ka forcuar bashkëpunimin policor. Me rendësi është marrëveshja me Europolin për dhënien e të drejtës së aksesit në sistemin elektronik. Në nëntor 2021 ky bashkëpunim është shtrirë, duke i dhënë akses edhe SPAK.”, tha ai.
