Lideri demokrat, Lulzim Basha ka reaguar pas dy ngjarjeve të rënda, ku babai vrau dy fëmijët e mitur në Korçë, ndërsa në Fier, burri vrau gruan duke e hedhur zhveshur nga dritarja. Ai thotë se këto ngjarje e kanë tronditur dhe ato më shumë se tragjedi individuale, janë ngjarje që reflektojnë varfërinë dhe dëshpërimin që ka ngërthyer shoqërinë.
Statusi i plotë i Bashës në facebook
Jam i tronditur nga krimet e tmerrshme në familje në Fier dhe në Korçë. Jam veçanërisht i hidhëruar që këto krime kanë marrë jetë të pafajshme fëmijësh dhe grash.
Këto ngjarje më shumë se krime individuale reflektojnë gjëndjen e varfërisë dhe dëshpërimit ku ka hyrë shoqëria jonë, si dhe rënien e mbështetjes shoqërore për njëri-tjetrin.
Shqipërisë duhet t’i kthehet shpresa, duhet t’i kthehen mundësitë në mënyrë që të gjithë të jetojnë të mirëqenë dhe të qetë.
Politika ka rolin kryesor për këtë gjë: Ajo duhet të pushojë së punuari për pakicën dhe duhet t’u rikthehet njerëzve dhe halleve të tyre.
Ne nuk mund të vrasim njëri tjetrin, duhet të vrasim politikën e keqe. Ne duhet të japim jetën për fëmijët tanë dhe jo të marrim jetë fëmijësh.
