Sekuestrohet pasuria e ish-deputetit socialist Arben Ndoka. Me urdhër të prokurorisë së krimeve të rënda janë sekuestruar një sipërfaqe prej 300 mijë m2 tokë në bregdet dhe disa apartamente në plazhin e Shëngjinit. Sipas prokurorisë bëhet fjalë për sipërfaqe tokësore në zonën e Malit të Rrenzit, Shëngjinit, Rana e Hedhur, Laguna e Lezhës si dhe disa apartamente në plazhin e Shëngjinit.
Sipërfaqja e tokës e vënë nën sekuestro është përfituar në mënyrë të paligjshme, pasi toka ka qënë në pronësi të shtetit, por nëpërmjet dokumenteve të falsifikuara, është ndryshuar pronësia nga shtet në privat.
Në janar të këtij viti, Gjykata për Krimet e Renda refuzoi kërkesën për të liruar nga “arresti shtëpiak” dy ish-deputetët Arben Ndoka dhe Arben Cuko. Dy ish deputetët u arrestuan gjatë operacionit “Vol-vo 4” në tetor të vitit 2018. Ndoka, i dyshuar për disa vepra penale mes te cilave “tjetërsim pronash” dhe “falsifikim dokumentesh”, ndërsa Cuko per “korrupsion”.
Në tetor të 2018, me dy vendime të veçanta të Gjykatës së Krimeve të Rënda, janë arrestuar Arben Çuko dhe Arben Ndoka, ish-deputetë të Partisë Socialiste në Kuvendin e Shqipërisë.
Së pari është arrestuar Çuko, ish-drejtor i Përgjithshëm i Burgjeve, dhe më herët ish-deputet , ka përfunduar në pranga nën dyshimet për korrupsion. Ai ishte shkarkuar nga detyra më 3 shtator të 2018 “për keqmenaxhim të patolerueshëm dhe dyshime të forta për korrupsion”.
Pak pas arrestimit të ish deputetit socialist, u njoftua se të njëjtin fat kishte patur dhe ish kolegu i tij Arben Ndoka. Ky i fundit është arrestuar së bashku me të vëllain dhe një grup personash të tjerë që dyshohen “për veprat penale ‘Falsifikimi i dokumenteve’, ‘Falsifikimi i vulave, stampave ose i formularëve”, “Shpërdorimi i tokës”, në kuadër të një grupi kriminal, të përfshirë në tjetërsim tokash.
Në mars 2018, Policia e Lezhës hetoi një grup kriminal që dyshohej se ishte lidhur me abuzimet toka e troje në zonën e Shëngjinit dhe ndaloi 12 persona, mes tyre edhe Kryetari i Bashkisë Lezhë, ndërsa 11 u shpallën në kërkim. Ata në bashkëpunim me njëri-tjetrin akuzohen se kanë falsifikuar, tjetërsuar dhe përvetësuar 234,548 m2 tokë shtetërore ranishte në zonën bregdetare Shëngjin, Lezhë. Disa javë më vonë, Gjykata e Shkallës së Parë Lezhë dhe Gjykata e Apelit Shkodër, ndryshuan masat për një numër të konsiderueshëm shtetasish, mes tyre edhe Kryetari i Bashkisë Lezhë, si dhe 2 shtetas të ri-shpallur në kërkim.
Emri i Arben Ndokës u lakua për një kohë të gjatë në vitin 2014, kur ai ishte deputet. Partia Demokratike publikoi në atë kohë dokumentat sipas të cilave Ndoka rezultonte të ishte dënuar në Itali, në fund të viteve ’90 me mbi 7 vjet burgim, për “shfrytëzim prostitucioni në rrethana të rënduara”, dhe se një pjesë të dënimit e kishte shlyer në burgjet shqiptare.
Ndoka, i cili foli për një ngjarje aksidentale, rezultonte të ishte liruar në vitin 2005 dhe më pas ai është angazhuar dhe në funksione drejtuese në administratën publike, deri dhe në Gardën e Republikës apo policinë e shtetit, sic ka pohuar ai vetë. Ndërsa deri para se të përfshihej në listat e socialistëve në zgjedhjet e 2013, ka qenë në postin e drejtorit në Inspektoriatin Ndërtimor Urbanistik Kombëtar, në administratën e drejtuar nga demokratët./Opinion.al
