Kërkesa e ish-kryeprokurorit Adriatik Llalla, për mos zgjatje të hetimeve ndaj tij u rrëzuar sot nga Gjykata e Krimeve të Rënda.
Prokuroria ka kërkuar më herët zgjatjen edhe me tre muaj të hetimeve me arsyetimin se pret dy letërporosi nga Gjermania dhe SHBA. Kjo kërkesë u ankimua nga avokati i Llallës i cili deklaroi se organi i akuzës e ka patur kohën e mjaftueshme për të kryer hetimet ndaj klientit të tij. Gjithsesi, gjyqtari Bib Ndreca vendosi sot të rrëzojë kërkesën e Llallës.
Ish-kryeprokurori Adriatik Llalla është në hetim nga Prokuroria e Krimeve të Rënda për tre akuza: pastrim parash, fshehje apo mosdeklarim të pasurive dhe mosdeklarim i parave në kufi.
Prokurori i çështjes është duke pritur një letërporosi nga Gjermania mbi shpenzimet e Llallës që përfshijnë vizitat e tij në këtë shtet, por edhe tarifat e shkollimit të fëmijëve të tij. Sipas prokurorisë kjo shifër është rreth 60 mijë euro dhe siç dyshohet nuk është deklaruar në kufi.
Deri tani procesi ndaj ish-shefit të akuzës ka rezultuar në favor të prokurorisë e cila ka vendosur sekuestro preventive për disa pasuri që kapin vlerën 1 milion euro ku përfshihen troje dhe një apartament. Tre gjykata kanë vendosur kundër rikthimit të tyre duke nxjerrë fituese prokurorinë. /Opinion.al
