Prokuroria për Krimet e Rënda ka lëshuar të mërkurën pasdite urdhër-arreste për disa ish-drejtues të lartë të Policisë së Shtetit.
Burimet nga Krimet e Rënda thanë se ata dyshohen si të përfshirë në organizata krimanale të trafikut të lëndëve narkotike.
Mësohet se pritet të arrestohet ish-drejtori i Policisë së Vlorës, Jaeld Çela, ish-shefi i Kufirit Sokol Bode dhe Gjergji Kohila, shefi i krimit të organizuar në Policinë e Vlorës.
Urdhër-arrestet bazohen në hetimet që ka kryer Prokuroria e Krimeve të Rënda në lidhje me dosjen Habilaj, ku rezulton i përfshirë edhe ish-ministri i Brendshëm, Saimir Tahiri.
Këto urdhër-arreste kanë mbërritur në polici dhe pritet ekzekutimi i tyre.
Prokuroria kërkon arrestim të atyre që i cilëson si bashkëpunëtorë të Tahirit në trafikun e drogës. Ish-ministri u vu nën hetim pas bërjes publike të përgjimeve nga pala italiane për dosjen ‘Habilaj’.
Por, Kuvendi nuk e dha autorizimin për arrestimin e tij. Aktualisht Prokuroria ka kryer kontroll banese dhe e ka marrë në pyetje Tahirin për hetimet që janë duke u kryer.
