Ambasadori i Bashkimit Europian në Tiranë Luigi Soreca u bën thirrje publike prokurorëve të kandidojnë për anëtarë të SPAK para datës 7 Shkurt. Përmes një postimi në tuiter, ai thotë se kjo është një kohë e rëndësishme që prokurorët të japin kontributin e tyre në luftën kundër korrupsionit dhe krimit të organizuar.
“U bëjmë thirrje prokurorëve të aplikojnë para datës 7 shkurt për t’u bërë anëtarë të SPAK. Kohë e rëndësishme për të dhënë kontributin tuaj themelor në luftën kundër korrupsionit dhe krimit të organizuar në Shqipëri dhe të jepni drejtësi për gjithë shqiptarët. BE-ja është përkrah jush”, shkruan Ambasadori në postimin e tij. Soreca, që prej ardhjes së tij në Tiranë vazhdimisht ka qenë i vëmendshëm në çështjet që lidhen me luftën kundër krimit të organizuar, edhe për faktin që ai vetë vjen nga fusha e Prokurorisë.
Kujtojmë se SPAK (Struktura e Posaçme kundër Korrupsionit dhe Krimit të Organizuar) ka 15 vende bosh ku mund të aplikojnë të gjithë prokurorët e vendit./ M.B
