Një e burgosur për akuza federale në SHBA do të ekzekutohet për herë të parë në gati 70 vjet, tha Departamenti i Drejtësisë.
Lisa Montgomeri do të ekzekutohet me një injeksion vdekjeprurës në Indiana më 8 dhjetor.
Në dhjetor 2004, Montgomeri hyri në shtëpinë e një gruaje shtatzënë, 8 muajshe dhe e shtrëngoi në grykë deri sa ajo humbi ndjenjat. Më pas ajo mori një thikë kuzhine dhe i çau barkun gruas e cila rifitoi ndjenjat nga dhimbja. Por kësaj radhe Montgomeri e shtrëngoi në grykë deri sa e la të vdekur gruan. Ajo më pas hoqi foshnjën nga barku i viktimës dhe e mori me vete duke pretenduar se ishte i saji.
Në vitin 2007, një juri e shpalli Montgomerin fajtore për rrëmbimin federal që rezultoi në vdekje dhe unanimisht rekomandoi një dënim me vdekje.
Por avokatët e Montgomery thonë se ajo kishte përjetuar dëmtime në tru nga rrahjet kur ishte fëmijë dhe kështu që nuk duhet të përballet me dënimin me vdekje.
Gruaja e fundit që u ekzekutua nga qeveria amerikane ishte Bonie Heidi, e cila vdiq në një dhomë gazi në Misuri në 1953, sipas Qendrës së Informacionit të Dënimit me Vdekje.
Ekzekutimi federal i Brandon Bernard, i cili me bashkëpunëtorët e tij vrau dy të rinj në 1999, është planifikuar gjithashtu për në dhjetor.
Prokurori i Përgjithshëm i SHBA, Uilliam Barr tha se krimet ishin “vrasje mizore”.
Vitin e kaluar, administrata Trump tha se do të rifillojë ekzekutimet federale./ Opinion.al
