Partia Socialiste e Kavajës ka propozuar 6 emra si kandidatë për kryetar bashkie, mes tyre gruaja e kryetarit të PSsë, Gentian Daja. Pasi ka vënë gruan në listë për qytetare e parë, Daja ka njoftuar dorëheqjen.
Në një status në facebook ai shkruan: “Miq, sapo mbaroi mbledhja e Asamblesë Socialiste të Kavajës ku u propozuan 6 kandidate për Kryetar Bashkie një ndër të cilat
edhe bashkëshortja ime, Silvana Daja. Nisur nga ky propozim për të mos ndikuar jam I detyruar të dorëhiqem nga detyra e Kryetarit të Partisë Socialiste Kavajë”.
Daja, i cili më parë ka kryer funksionin e drejtorit të Transportit Rrugor, është akuzuar nga opozita për përfshirje në trafik droge. Pas miratimit të ligjit të dekriminalizimit, në një komision hetimor të drejtuar nga Genc Pollo, opozita listoi dhe emrin e tij si të përfshirë në trafik droge. Në shtator të vitit 2014, deputeti i Partisë Demokratike, Arben Ristani ka denoncuar se kreu i PS Kavajë, Gentian Daja është dënuar për trafik droge në Itali dhe Gjermani. Ai njihet si shoku i ngushtë i Elvis Rroshit.
“Unë jam mësuar me akuzat e PDsë. Opozita është mësuar të hedhë baltë, por unë nuk kam ndërmend të merrem me këtë çështje”, është shprehur ai.
Përsa i përket zgjedhjeve të 7 Majit në Kavajë, PD-ja ka deklaruar se nuk merr pjesë. Zgjedhjet e pjesshme u dekretuan nga Presidenti, pas largimit të Elvis Rroshit, për shkak të ligjit të dekremanilizimit. /Opinion.al
Në foto: Gentian Daja, Elvis Rroshi dhe Ergys Hoxha (drejtor në Kryeministri)
