Një i kërkuar ndërkombtarisht nga Interpoli në Kinë, është arrestuar ditën e sotme në Aeroportin e Rinasit. Shtetasi i lindur në Kinë ishte shpallur në kërkim më 23 maj të këtij viti për gjobëvënie, vepër penale që në shtetin kinez dënohet me maksimumi 10 vjet burg.
I arrestuari është pjesë e një grupi kriminal mafioz të cilët merren me aktivitetin e hapjes së kazinove, dhënies së huave dhe gjobëvënieve. Sipas zyrës së Sigurisë Publike të Bashkisë së Goazhou, në Kinë, e cila ka zhvilluar hetimet për këtë grup, rezulton se shtetasi me iniciale G. L, është një prej anëtarëve kryesorë të këtij grupi.
Në vitin 2013, ky shtetas së bashku me pjesëtarë të tjerë të grupit, kanë rrëmbyer një person, duke e detyruar atë të ripaguajë një borxh, në vlerën e 3.8 milionë Yuan kinez (rreth 550 mijë dollarë). E njejta skemë është përdorur një vit më vonë kur një shtetasi tjetër është detyruar të shesë 23 suita, 40 vendparkime dhe 6 automjete me çmimin shumë të ulët për të paguar një hua. Si rezultat i këtij bashkëpunimi u bë i mundur arrestimi i shtetasit të mësipërm, me qëllim ekstradimin e tij drejt Kinës. /Opinion.al
