Kryetari i Lidhjes Demokratike të Kosovës, Lumir Abidixhiku, e ka kritikuar kryeministrin Albin Kurti për përfshirjen e tij në protesta dhe fushatën elektorale për zgjedhjet parlamentare më 25 prill në Shqipëri.
Në një postim në rrjetet sociale Abidixhiku, i ka kujtuar Kurtit se ndërkohë që ai merret me zgjedhje e protesta në Shqipëri, në Kosovë humbin jetën nga 80 persona në javë si pasojë e COVID-19 dhe të moshuarit presin vaksinën, duke shtuar se kjo sjellje nga ana e tij tregon papjekuri dhe papërgjegjshmëri.
“Marrja me zgjedhje e protesta në Shqipëri,nga Kryeministri, ministrat e deputetët e tij, në kohë kur nga 80 bashkëqytetarë në javë na vdesin në Prishtinë; kur të moshuarit e të rrezikuarit presin vaksinim, tregon papjekuri, tregon papërgjegjësi”, ka shkruar ai përmes një postimi në Facebook.
Më tej, Abidixhiku thotë se qeveria e Kurtit i ka braktisur njerëzit pasi në kulmin e krizës shëndetësore e ekonomike ka zgjedhur të jetë opozitë në një shtet tjetër.
“Ajo i ka braktisur njerëzit e vet. Në vend të kësaj, në kulmin e krizës shëndetësore e ekonomike, pozita, e zgjedhur për të prirë këtu, ka zgjedhur të jetë opozitë protestash e fushatash në një tjetër shtet”.
“Duket se 14 shkurti është kuptuar si fund e jo si fillim. Por me këtë fillim të dobët, të dobët shumë, edhe muajt e mjaltit marrin fund. Keni përgjegjësi, mbani përgjegjësi”, ka shkruar Abdixhiku.
