Koha për një ndryshim të vërtetë, quhet manifesti i Partisë Laburiste në Mbretërinë e Bashkuar, i cili u prezantua nga kreu i saj Xheremi Korbin, 3 javë para zgjedhjeve të parakohshme.
Dokumenti i quajtur radikal krahasuar me atë të dy viteve më parë parashikon rritje të shpenzimeve të qeverisë si dhe shtetëzimin e hekurudhave, postës, shërbimit të ujësjellësit dhe energjitikës.
Manifesti ka në qendër të tij politikat e brendshme dhe përqendrohet te rritja e shpenzimeve qeveritare të cilat do të financohen nga taksat që do të rriten për ata që kanë fitime të larta dhe për korporatat.
Korbin premtoi transformimin në një ekonomi të gjelbër duke nënvizuar se problemi i klimës është real dhe për këtë duhet vepruar menjëherë. Programi i tij parashikon të vjelë 11 miliardë paund nga rritja e taksave për kompanitë e gazit dhe të naftës. Taksimi i tyre do të bëhet në varësi të kontributit që ato kanë dhënë në të shkuarën për mbrojtjen e klimës.
Një qeveri e drejtuar nga Laburistët do të rriste me 5% rrogat e punonjësve në sektorin publik gjatë 4 viteve në pushtet.
Manifesti parashikon ndër të tjera ndërtimin e 150 mijë banesave sociale, caktimin e pagës minimale 10 paund në orë, rishikimin e moshës së pensionit për personat me punë të rënda, taksë për shtëpitë e dyta, automatikisht të drejtën e qëndrimit të shtetasve të BE që jetojnë në Mbretërinë e Bashkuar, uljen e moshës së votimit në 16 vjeç.
Sa i përket çështjes së Brexit, Korbin tha se ai do të përpiqet që të ruajë privilegjet e lëvizjes së lirë e cila do të jetë në bazë të një marrëveshjeje të rinegociuar e cila do të kalojë në një referendum popullor. /Opinion.al
