Kreu i Komisionit Qendror i Zgjedhjeve, Ilirijan Celibashi i ka bërë thirrje Kuvendit të Shqipërisë që të mos miratojë dy projektligje me ndikim fiskal.
Përmes një postim në rrjetet sociale, Celibashi shprehet se miratimi i dy projektligjeve, ai për paketën e maleve dhe për tatimin mbi vlerën e shtuar, nuk respekton kërkesat e Kodit Zgjedhor dhe mund të ndikojë në elektorat.
Reagimi i plotë
Sot në seancën publike konstatova se miratimi i dy projektligjeve, “Për disa shtesa dhe ndryshime në ligjin nr. 92, datë 24.07.2014, ‘Për tatimin mbi vlerën e shtuar në Republikën e Shqipërisë’” dhe projektligjit “Për paketën e maleve”, nuk respekton kërkesat e nenit 91, pika 4, të Kodit Zgjedhor.
Ky vendim bazohet në parimin e neutralitetit të institucioneve shtetërore gjatë periudhave zgjedhore, me synimin për të shmangur çdo ndikim të mundshëm mbi elektoratin përmes ndryshimeve në politikat fiskale apo ekonomike.
Në këtë kontekst, miratimi i këtyre projektligjeve, të cilat prekin politika të rëndësishme fiskale, mund të krijojë perceptimin e përdorimit të mjeteve ligjore për qëllime elektorale. Për këtë arsye, i kërkoj Kuvendit të Shqipërisë të mos i shqyrtojë këto dy projektligje në seancë plenare.
