Kreu i KLP-së, Gent Ibrahimin ka zhvilluar ditën e sotme një takim me zv. Ndihmës Sekretar i Shtetit, Jorgan K. Andrews .
Zyrtari amerikan është shprehur se Shtetet e Bashkuara të Amerikës janë të ndërgjegjshme për presionin me të cilin po përballet Këshilli i Lartë i Prokurorisë dhe janë të vendosura për të ofruar mbështetje për mbrojtjen e prokurorëve të Strukturës së Posaçme AntiKorrupsion (SPAK).
“Keni ngritur një baze ligjore të fortë për institucionet e reja të drejtësisë, e aftë të mbajë larg korrupsionin dhe presionin e politikës mbi këto strukturat”, është shprehur Andrews.
Jorgan K. Andrews ka thënë gjatë takimi se në Shqipëri “duhet ndryshuar mentaliteti për të luftuar korrupsionin dhe krimin e organizuar sepse tani do të keni instrumentat e duhura”.
Ndërkohë, kreu i KLP ka thënë se në 10 muaj është ngritur nga KLP e gjithë infrastruktura ligjore për formimin e SPAK.
“Këshilli është në hapat e fundit për dy procese të rëndësishme: zgjedhja e Prokurorit të Përgjithshëm dhe ngritja e SPAK. Këshilli shikon hapësirat ligjore për ngritjen e SPAK me 8 prokurorë tashme të vetuar dhe 2 prokurorë te komanduar nga lista e kandidateve të kualifikuar për SPAK, të cilët kanë kaluar vetting-un me vendim të formës së prerë”,- është shprehur kreu i KLP-së.
Në këtë takim ishin të pranishëm Leyla Moses- Ones, e ngarkuara me punë e SHBA në Shqipëri, Julie Craven dhe Michelle Lakomy nga OPDAT./ Opinion.al E.Xh.
