Drejtori i Përgjithshëm i Burgjeve Arjan Hoxha, i emëruar nga PD në bazë të marrëveshjes Rama-Basha reagoi pas akuzave të 3 drejtoreve të LSI, te shkarkuar nga burgjet 3 ditë më parë.
“Në disa burgje të vendit janë konstatuar shkelje të detyrës dhe për këtë arsye i është propozuar Ministrit të Drejtësisë shkarkimi i drejtorëve të këtyre institucioneve të vuajtjes së dënimit”, thuhet ne nje deklarate te tij per mediat.
Sipas Hoxhës, drejtorët e shkarkuar janë zëvendësuar menjëherë dhe për këtë arsye nuk rrezikohet puna e institucionit.
Ai ka bërë publike edhe shkeljet në detyrë që kanë bërë drejtuesit e disa burgjeve, tashme të larguar:
– përdorimi i institucionit dhe funksionit publik për qëllime politike;
– fikja e kamerave të sigurisë së institucionit për disa ditë, pa asnjë motiv dhe shkak objektiv, duke krijuar bindjen e plotë për sjellje antiligjore brenda ambienteve të institucionit;
– shndërrimi i IEVP-ve në institucione punësimi fiktiv, ku punonjësit paguhen, edhe pse evidentohet që nuk paraqiten në punë;
– dhënia e lejeve ndaj të dënuarve në kundërshtim me ligjin dhe procedurat;
– falsifikimi i librave të hyrje-daljes në institucion;
– moszbatimi i urdhrave të eprorit.
