Prokurori italian i Anti-mafias dhe Antiterrorizmit, Franco Roberti, flet sërish mbi rritjen e trafikimit të drogës nga Shqipëria drejt Pulias.
I pyetur nga gazetarët, pas ceremonisë së prezantimit të librit të tij, Roberti tha se bëhet fjalë për një dukuri tepër shqetësuese.
“Ne kohët e fundit shkuam së bashku me prokurorët e Barit, Leçes dhe Catanzaros për t’u takuar me kolegët shqiptarë në Tiranë, vetëm për të nxitur bashkëpunim më të ngushtë dhe të kërkojmë hetime në atë territor, sepse në fakt kemi parë se trafik i drogës nga Shqipëria në Pulia dhe Kalabri janë rritur ndjeshëm. Flasim për tonelata dhe pikërisht disa ditë para se të shkonim në Tiranë, është sekuestruar një ton drogë në Puglia. Në takimi u diskutua për këtë çështje, nga ky zbulim, por prej kohësh kemi verifikuar se trafiqet janë rritur ndjeshëm”, shtoi më tej prokurori italian.
Kjo nuk është hera e parë që Roberti ka bërë deklarata të tilla shqetësuese për Shqipërinë. Vetëm pak kohë më parë kreu i antimafias italiane, gjatë vizitës në Shqipëri në shkurt të këtij viti u shpreh: “Kemi konstatuar që vitet e fundit trafiqet mes Italisë dhe Shqipërisë janë shumëfishuar, janë rritur në mënyrë eksponenciale. Atëherë donim të kuptonim me kolegët shqiptarë shkaqet e kësaj rritjeje eksponenciale të trafiqeve të drogërave, veçanërisht të marjiuanës dhe në vazhdimësi të kuptonim se çfarë duhet bërë më shumë dhe më mirë për të luftuar këtë fenomen.”
Sipas Robertit, droga e transportuar nga Shqipëria drejt Italisë është trefishuar.
