Një sasi tritoli shpërtheu mbrëmjen e së martës në hyrje të banesës së Dritan Kanaparit në Kavajë. Ai është kreu i AK për këtë qytet. Në një intervistë për “Gazeta Shqiptare” Kanapari është shprehur se tritolin ma ka vendosur kreu i Bashkisë së Kavajës Elvis Roshi dhe Ergys Hoxha, shefi i Antikorrupsionit në Kryeministri. Nga shpërthimi pati vetëm dëme materiale dhe jo persona të lënduar, ndërsa shton se ka qenë i kërcënuar edhe herë të tjera.
Pjesë nga intervista
“Këtë gjë e kanë bërë për të më kërcënuar. I dyshuari kryesor për mua është kryetari i Bashkisë Kavajë Elvis Roshi dhe Ergys Hoxha. Këtë e di edhe policia dhe ulën kokën. Të zbardhet sa më shpejt. Ne nuk do tërhiqemi. Do ta vazhdojmë betejën deri në fund. Unë jam i dekoruar si “Pishtar i Demokracisë”, si protagonist në lëvizjet e para antikomuniste dhe kam qenë i arrestuari i parë në qytetin e Kavajës, më 29 janar 1990. Një vit e gjysmë më parë më kanë shembur banesën dhe ka qenë haptas një shembje për arsye politike. Unë kam mbështetur kandidatin opozitar të PD-së. Aty filluan edhe kërcënimet, sepse unë administroj një faqe që quhet “Buletini i Kavajës”. Jo, nuk kam bërë denoncim. Nuk ka qenë nevoja të bëja denoncim, sepse unë isha një njeri gjysmë publik, përderisa shkruaja në portalin tim. Pastaj, ku mund të bëja unë kërcënim kur ata të gjithë janë të shtetit?”
