Kremlini ka deklaruar të mërkurën se mbështet përpjekjet e Serbisë për të mbrojtur serbët etnikë në Kosovën veriore, por mohoi akuzat e Prishtinës se Rusia në një farë mënyre po nxiste tensionet në një përpjekje për të mbjellë kaos në të gjithë Ballkanin.
Zëdhënësi i presidentit rus, Vladimir Putin, Dmitry Peskov, deklaroi se Serbia thjesht po mbronte të drejtat e serbëve etnikë,
I pyetur në lidhje me pretendimin e ministrit të Brendshëm të Kosovës, Xhelal Sveçla se Serbia, nën ndikimin e Rusisë, synonte të destabilizonte Kosovën duke mbështetur pakicën serbe, zëdhënësi Peskov tha se ishte “plotësisht e gabuar”.
“Serbia është një vend sovran dhe është absolutisht e gabuar të kërkosh ndikimin shkatërrues të Rusisë këtu”, tha Peskov.
“Serbia është një vend sovran dhe natyrisht, ajo mbron të drejtat e serbëve që jetojnë aty pranë në kushte kaq të vështira dhe natyrisht reagon ashpër kur këto të drejta shkelen”-vijoi Peskov.
Serbia mohon se po përpiqet të destabilizojë Kosovën dhe thotë se thjesht dëshiron të mbrojë pakicën serbe atje.
Presidenti serb, Aleksandër Vuçiç tha të martën se Serbia do të “vazhdojë të luftojë për paqen dhe të kërkojë zgjidhje kompromisi”.
Ministri Sveçla deklaroi më 27 dhjetor se Serbia është ndikuar nga Rusia kur ka marrë vendimin që të rrisë në nivelin më të lartë gatishmërinë luftarake të forcave ushtarake dhe policore.
Rreth 50,000 serbë jetojnë në pjesën veriore të Kosovës dhe refuzojnë të njohin qeverinë apo shtetin e Prishtinës. Ata e shohin Beogradin si kryeqytetin e tyre, shkruan Reuters.
Kremlini tha se mbështet Beogradin. “Duke pasur marrëdhënie shumë të ngushta aleate, marrëdhënie historike dhe shpirtërore me Serbinë, Rusia po monitoron me shumë vëmendje se çfarë po ndodh, si respektohen dhe sigurohen të drejtat e serbëve”, tha Peskov. “Dhe, sigurisht, ne mbështesim Beogradin në veprimet që po ndërmerren”.
Serbët në Mitrovicën Veriore ngritën barrikada të reja të martën, disa orë pasi Serbia tha se e kishte vënë ushtrinë e saj në gatishmërinë më të lartë luftarake pas javëve të përshkallëzimit të tensioneve.
