Studimet tregojnë se të rinjtë po martohen më pak dhe më vonë në krahasim me brezat e mëparshëm. Dhe kjo nuk është vetëm një tendencë globale.
Të dhënat nga INSTAT tregojnë se martesat kanë hyrë në një trend rënës në vitet e fundit. Duke shënuar në 2017-n edhe rekordin më të ulët, sipas të dhënave të INSTAT në Vjetarin e Statistikave Rajonale.
Në vitin 2017 janë regjistruar në zyrat e gjendjen civile rreth 22,5 mijë martesa. Shifër kjo e ulur me 0,4 % krahasuar me një vit më parë, por me një rënie prej 5,7 % krahasuar me vitin 2013.
Numri i martesave në vendin tonë ka pasur luhatje, duke arritur vlerën më të ulët në vitin 2017 me rreth 22,5 mijë martesa, raporton INSTAT.
Por edhe pse më rënie, disa prej qyteteve të Shqipërisë nuk e kanë humbur besimin tek institucioni i martesës. Lezhjanët kryesonin listën për sa i përket shpenzimeve të larta për alkool. Por ky nuk është rekordi i vetëm që ata mbajnë.
Lezhjanët kanë numrin më të lartë të martesave të lidhura në 2017-n. Sipas të dhënave që ka publikuar nga INSTAT norma e martesave në qarkun e Lezhës ishte 10.2 për 1000 banorë, ndërsa mesatarja në të gjithë vendin ishte 7.7.
Qarqe të tjera që kanë një numër më të lartë se mesatarja kombëtare për martesat e lidhura janë Berati, Dibra, Durrësi dhe Fieri dhe Elbasani.
Rekordin më të ulët për martesat e lidhura gjatë 2017-s e mban kryeqyteti. Aty ku është përqendruar edhe një pjesë e madhe e popullsisë.
