Rudina Hajdari ka thënë sot në takimin me përfaqësues të parlamentit holandez se pakënaqësitë e opozitës ishin legjitime por mandati nuk duhet lënë. Ajo është pjesë e delegacionit që po zhvillon takime në Vendet e Ulta për të lobuar për hapjen e negociatave të Shqipërisë me BE.
Krah kryetarit të Kuvendit Gramoz Ruçit dhe kryetarit të grupit parlamentar të PS, Taulant Balla, Hajdari tha se arsyeja se pse ajo ishte krah përfaqësuesve të mazhorancës ishte për të mirën e negociatave. Gjithashtu Hajdari vuri në dukje qëndrimin e saj kundër protestave pasi ato dëmtojnë imazhin e vendit.
“Arsyet pse jam këtu pranë mazhorancës është se ne duhet të na hapin negociatat. Shpresojmë se në të ardhmen të mos kemi dhunë e protesta sepse dëmtojnë imazhin e Shqipërisë. Shpresojmë që çështjet e brendshme t’i zgjidhim”, tha Hajdari.
Ajo vlerësoi përpara deputetëve holandezë përpjeket dhe arritjet e Shqipërisë në fushën e bashkëpunimit me NATO dhe çmoi si të mjaftueshme hapat e Shqipërisë për të hapur negociatat. Në një gjuhë të ngjashme me të kryeministrit Rudina Hajdari bëri edhe një apel se nëse nuk hapen negociatat na pret një e ardhme e panjohur por dhe e rrezikshme.
“Ne mendojmë se jemi gati. Nuk duhet të paragjykojmë njëri-tjetrin. Frika na izolon. Shqipëria ka 10 vjet në NATO, çka e bën aleate të rëndësishme në Ballkan. Nëse Shqipëria hap negociatat do të kemi më shumë përgjegjësi për të vazhduar me reformat dhe të arrijmë standardet tuaja. Nëse nuk hapen negociatat muajin e ardhshëm, ne nuk e dimë çdo ndodhë vitin e ardhshëm, apo në Europë. Mos lejoni ndërhyrjet e tjera që duan ta tërheqin orientimin tonë drejt Bashkimit Europian”.
Fakti se gjendja e kriminalitetit mbetet shqetësuese për një numër të madh vendesh të BE u vu në dukje nga një prej deputetëve holandezë. Hajdari argumentoi se këto probleme janë reale por që mund të zgjidhen brenda përbrenda vendit.
“Mazhoranca u bë arrogante me kalimin e kohës. Unë po ju them çfarë shqetësimesh kam personalisht me mazhorancën. Nuk ka bërë mjaftueshëm me krimin e organizuar dhe reformën zgjedhore. Por, këto janë gjëra të politikës së brendshme. Roli i opozitës është të kontrollojë çfarë bën mazhoranca. Vlerësim për reformën në drejtësi” tha Hajdari. /Opinion.al
