Komisioni Qendror i Zgjedhjeve e konsideron absurde dhe të pa tolerueshme që 10 ditë para zgjedhjeve, ende nuk janë emëruar komisionerët e qendrave të votimit, duke fajësuar partitë politike, që siç thekson KQZ, e kanë detyrim ligjor të depozitojnë propozimet e tyre për anëtarë KQV -ve.
“Jemi vetëm 10 ditë para datës së zgjedhjeve dhe ndodhemi në një situatë absurde dhe të patolerueshme, komisionerët e qendrave të votimit ende nuk janë emëruar dhe partitë politike që kanë detyrimin ligjor t’i depozitojnë propozimet për anëtarë të KQV-ve, vijojnë të tregojnë neglizhencë dhe të mos respektojnë ligjin. Partitë politike që kanë detyrimin ligjor t’i depozitojnë propozimet për anëtarë të KQZ-ve, vijojnë të mos reagojnë duke shkelur afatet ligjore”.
Në një dalje për mediat, zëdhënësja e KQZ tha se aktualisht në 62 KZAZ nuk kanë emëruar asnjë komisionerë për Qendrat e Votimit dhe në 31 prej tyre nuk është dorëzuar asnjë propozim nga asnjë parti politike.
“Kjo sjellje e partive politike është e pa tolerueshme, pasi tregon mungesë përgjegjshmëri në përmbushjen e të drejtave dhe detyrimeve që ju ngarkon Kodi Zgjedhor”, theksoi zëdhënësja Drilona Hoxhaj.
Sipas saj, mos emërimi i komisionerëve të Qendrave të Votimit rrezikon trajnimin e komisionerëve nga ana e KQZ-së dhe mos trajnimi i tyre ndikon në mënyrë të drejtpërdrejtë në administrimin e procesit zgjedhor.
“Partitë politike që kanë të drejtën të sjellin propozimet për komisionerët e qendrave të votimit, të depozitojnë në mënyrë urgjente propozimet e tyre pranë KZAZ-ve dhe të mos bëhen shkak për dëmtimin e procesit zgjedhor dhe cënimin e standardeve të zgjedhjeve”, theksoi ajo më tej.
