Komisioni Qendror i Zgjedhjeve ka reaguar në një deklaratë për mediat në lidhje me akuzat e opozitës për fletët e votimit në Vaun e Dejës.
Zëdhënësja Drilona Hoxha deklaroi se akuzat që janë hedhur nga opozita janë të padrejta. Në prononcimin e saj ajo sqaroi procedurën e transportimit të fletëve të votimit të cilat kishin ardhur nga Sllovenia.
“Duke marrë shkas lidhur me akuzat për fletë e Votimit në Vaun e Dejës, KQZ se fletët e votimit janë prodhuar nga kompania sllovene e cila u kontaktua nga KQZ pas ngjarjes së ndodhur në KZAZ 6. Në procesverbalin e doganës në 30 qershor në 2:30 të mëngjesit shkruhet procedura e transportit të fletëve të votimit. Mjeti u regjistrua nga kompania TIMS në orën 01:58 minuta dhe fletët e votimit u kontrolluan nga punonjësit e KQZ. Pas marrjes së dakordësisë është aplikuar procedura e deklarimit të thjeshtuar. pas kësaj procedure mjeti i është dorëzuar punonjësve të KQZ. Kjo procedurë ka përfunduar në orën 02:15 të mëngjesit. Fletët e votimit kanë mbërritur në Shkodër dhe shpërndarja e tyre ka përfunduar në orën 06:00 të mëngjesit, për të qenë gati para nisjes së orarit zyrtar të votimeve”, tha zëdhnësja e KQZ.
Opozita kishte akuzuar KQZ se kishte lejuar votimin në Vaun e Dejës me fletë votimi të falsifikuara, pasi materialet zgjedhore ishin dëmtuar një natë më parë. /Opinion.al
