Katër parti të reja që garuan në parlamentaret e 11 majit 2025, kanë përfituar kompensim financiar pas zgjedhjeve.
Kompensimi financiar është në masën e 12,7 milionë lekë në vota për 4 parti.
Bëhet fjalë për “Lëvizja Bashkë”, “Lëvizja Shqipëria Bëhet”, “Partia Mundësia” dhe “Partia Koalicioni Euroatlantik”.
Konkretisht, Lëvizja Bashkë do të përfitojë 2.3 milionë lekë, Lëvizja Shqipëria Bëhet do të marrë 3.8 milionë lekë kompensim financiar, për Partinë Mundësia do të shpërndahen 4.6 milionë lekë dhe 1.9 milionë lekë të tjera do të jepen për Partia Koalicioni Euroatlantik.
Pra, në total, bëhet fjalë për një shumë prej 12.7 milionë lekësh.
PARTITË QË MARRIN KOMPENSIM FINANCIAR PASZGJEDHOR DHE SHUMA E PËRFITUAR
Lëvizja Bashkë 2.307.418 lekë
Partia Lëvizja Shqipëria Bëhet 3.884.362 lekë
Partia Mundësia 4.601.488 lekë
Partia Koalicioni Euroatlantik 1.963.190 lekë
TOTALI: 12.756.458 lekë
KQZ argumenton se këto parti nuk kanë përfituar fonde publike paradhënie për fushatën zgjedhore, e për këtë arsye do të përfitojnë kompensimin paszgjedhor.
Kushti i vetëm që partitë të marrin këtë kompensim, është që duhet të kenë marrë jo më pak se 1% të votave të vlefshme në rang vendi. Vlera e një vote të vlefshme, sipas KQZ-së, është 94 lekë.
“Komisioni Qëndror i Zgjedhjeve ka detyrimin t’u kompensojë fonde nga Buxheti i Shtetit atyre subjekteve zgjedhore të cilat kanë marrë jo më pak se 1% të votave të vlefshme në shkallë vendi në zgjedhjet e datës 11 Maj 2025”, argumenton KQZ.
Vlen të theksohet se Partia Lëvizja Shqipëria Bëhet e Adriatik Lapajt, që në këto zgjedhje garoi në koalicionin Nisma Shqipëria Bëhet, së bashku me partinë e Endri Shabanit, do ta përfitojë e vetme kompensimin prej 3.8 milionë lekësh, pasi partia e Shabanit kishte përfituar fonde paradhënie për fushatën.
Edhe pse garuan në koalicion, bazuar në përllogaritjet e KQZ-së, Nisma Lëvizja Shqipëria Bëhet i ka marrë votat e saj të mjaftueshme për kalimin e pragut të paktën 1% që të përfitojë kompensimin paszgjedhor.
Për këtë arsye, kompensimi do të jepet vetëm për partinë e Lapajt, dhe jo atë të Shabanit, pasi i kishte marrë fondet përpara zgjedhjeve.
Po kështu, edhe partitë e tjera që kanë marrë votat e mjaftueshme, dhe nuk gjenden në listën e mësipërme, i kanë marrë fondet publike paradhënie për fushatën zgjedhore të 11 majit.
