Komisionerët e propozuar nga partitë politike janë kthyer në problem për Komisionin Qendror të Zgjedhjeve. Këtë e ka pohuar zëdhënësja e KQZ-aë, Drilona Hoxhaj e cila u shpreh se: “ashtu si në zgjedhjet e kaluara, partitë politike po tregojnë të njëjten sjellje problematike në respketimin e afateve ligjore për depozitimin e propozimeve për komisionerë të Qendrave të Votimit”.
Hoxhaj kujtoi se afati përfundimtar brenda të cilit duhej të ishin emëruar të gjithë Komisionerët e Qendrave të Votimit ka qenë data 5 qershor.
“Sot, jemi 12 ditë para datës së zgjedhjeve dhe janë emëruar më pak se 50% e komisionerëve të QV. Pavarësisht se janë ezauruar të gjithë rrugët e komunikimit (shkresor dhe verbal), vijon të mos ketë reagim nga Partia Socialiste e Shqipërisë, Partia Demokratike, Partia Republikane dhe Lëvizja Socialiste për Integrim, të cilat janë dhe subjektet që kanë të drejtën për të propozuar komisionerë në QV”.
KQZ i kërkon partive politike, konkretisht Partisë Socialiste, Partisë Demokratike, Partisë Republikane, Lëvizjes Socialiste për Integrim që të dorëzojnë menjëherë pranë KZAZ-ve, propozimet për komisionerë të Qendrave të Votimit.
“Afati për emërimin e tyre është tejkaluar dhe kjo sjell pamundësinë e trajnimit në kohë të komisionerëve. Trajnimi i komisionerëve është një detyrim ligjor i ngarkuar nga Kodi Zgjedhor, në funksion të mirëadministrimit të zgjedhjeve, pasi vetëm komisionerë të trajnuar dhe njohës të mirë të ligjit mund të ruajnë standardet zgjedhore” – përfundoi Hoxhaj.
