Ditën e sotme ka përfunduar afati prej 48 orësh që kryekomisioneri i KQZ Ilirjan Celibashi, vendosi për Partinë Demokratike që Lulzim Basha të firmoste si kryetar partia deklaratën solemne të parashikuar në Kodin Zgjedhor për tu regjistruar në zgjedhje, afati i cili skadon sot.
Pas përfundimit të këtij afati, PD e Alibeajt i është drejtuar me një shkresë KQZ, ku thekson se Lulzim Basha ka dhënë dorëheqjen nga drejtimi i PD që më 21 mars të vitit 2022.
Në shkresën e dërguar nga përfaqësuesi ligjor Indrit Sefa, thuhet se nga 18 marsi i vitit 2022 për ushtrimin e kompetencave të kryetarit të PD është autorizuar nënkryetari i partisë Enkelejd Alibeaj, siç parashikohet edhe në statutin e partisë dhe ligjeve.
Po ashtu, PD kërkon që KQZ të vijojë procedurat për regjistrimin në zgjedhjet lokale të 14 maijt.
Deklarata që duhet të plotësojë Basha
Deklarata njihet si një “përgjegjësi” e kryetarit të Partisë dhe si e tillë duhet plotësuar vetëm nga ai. Deklarata parashikohet në nenin 64 të Kodit Zgjedhor ku radhitet dokumentacioni që duhet të paraqitet për regjistrimin e një partie politike.
Dokumenti sipas Celibashit duhet të firmoset vetëm nga kryetari i Partisë dhe është përgjegjësi që nuk mund të delegohet. Në pikën e të këtij neni thuhet se: deklaratën me shkrim të nënshkruar nga kryetari i partisë politike ku përmendet angazhimi solemn për refuzimin për të marrë pjesë në praktika të blerjes së votës, marrjes së financimeve apo përfitimeve të kundërligjshme, veçanërisht nga ato që vijnë nga aktivitete kriminale, si dhe përkushtimin për të konkurruar në zgjedhje në mënyrë të ndershme dhe me integritet. Teksti i deklaratës përcaktohet nga KQZ-ja./ Opinion.al
