Komisioni Qendror i Zgjedhjeve gjatë mbledhjes së kësaj të hëne shqyrtoi projekt-vendimet për regjistrimin e kandidatëve për kryetar Bashkie të partisë se Astrit Patozit, “Bindja Demokratike”.
Pavarësisht debateve të forta me përfaqësuesin e PD-së, KQZ me shumicë votash ka miratuar të gjithë kandidatët.
Kështu Arben Skënderaj kandidon në Tiranë, Valbona Mezini në Vlorë, Valbona Sakollari në Durrës, Ylber Gjeta në Kamëz, Salvador Kaçaj në Lezhë dhe Leonard Olli në Korçë.
Për këtë zhvillim reagoi dhe nënkryetari i PD, Edi Paloka. Në një reagim të gjatë në Facebook, ai shkruan se me këto veprime, KQZ po e bën edhe më evidente farsën e zgjedhjeve.
Ai shton se Rama urdhëroi ushtarët e tij në këtë institucion që në kundërshtim me ligjin dhe kushtetutën të regjistrojnë brenda ditës një parti, duke e quajtur edhe subjekt opozitar.
Paloka shkruan se zgjedhje farsë me Ramën, që e quan kampion të përdhunimit të zgjedhjeve, me 30 qershor nuk do të ketë./ Opinion.al
