Komisioni Qendror i Zgjedhjeve i ka dhënë sot mandatin e deputetit dy kandidatëve të Partisë Demokratike, Ligoraq Karamelos nga lista e Korçës dhe Alban Zenelit nga lista e Kukësit. Vendimi për dhënien e mandateve u mor me katër vota pro dhe një kundër. Vota kundër ishte e kreut të KQZ-së, Klement Zguri.
Ligoraq Karamelo zëvendëson Ervin Salianjin, ndërsa Alban Zeneli zëvendëson Flamur Nokën. Gjithashtu sot iu hoq përfundimisht mundësia e marrjes së mandatit 14 kandidatëve të tjerë të Partisë Demokratike dhe të Lëvizjes Socialiste për Integrim, të cilët nuk dorëzuan formularin e vetëdeklarimit brenda afateve ligjore.
Alban Zeneli, megjithëse deklaroi në protestën e 5 marsit se kishte hequr dorë nga mandati, ditën e djeshme dorëzoi formularin e vetëdeklarimit duke kërkuar të zërë vendin e Flamur Nokës në Kukës./Opinion.al
