Kolegji i Posaçëm Apelimit ka mbyllur hetimet ndaj anëtar të Gjykatës së Lartë, Edmond Islamaj.
Konkluzionet dhe verifikimet që janë bërë gjatë hetimeve do të dalin më datën 2 maj.
Islamaj është konfirmuar në detyrë nga KPK, por Komisioneri e apeloi dhe prej muajsh po vazhdon çështja në apelin e vetting-ut.
Po ashtu, në seancën e ditës së sotme janë sjellë dhe dokumente nga jashtë vendit, për të justifikuar të ardhurat për udhëtimet jashtë vendit të Edmond Islamaj.
Njoftimi
Kolegji i Posaçëm i Apelimit zhvilloi më datë 17 prill 2019, seancën gjyqësore publike të radhës për çështjen (JR) nr. 9/2018, datë 19.07.2018, që i përket ankimit të paraqitur nga Komisioneri Publik kundër vendimit nr. 22, datë 07.06.2018, të Komisionit të Pavarur të Kualifikimit që lidhet me procesin e rivlerësimit kalimtar të subjektit të rivlerësimit Edmond Islamaj.
Gjatë seancës së sotme gjyqësore, trupi gjykues vendosi të mbyllë shqyrtimin gjyqësor të çështjes, duke administruar të gjitha aktet e ardhura nga Komisioni i Pavarur i Kualifikimit në fashikullin e gjykimit dhe të gjitha provat e tjera të marra nga Kolegji i Posaçëm i Apelimit gjatë procesit të gjykimit të kësaj çështjeje.
Për t’i lënë kohën e nevojshme subjektit të rivlerësimit dhe Komisionerit Publik për të paraqitur konkluzionet përfundimtare, trupi gjykues vendosi të shtyjë seancën gjyqësore për në datën 02.05.2019, ora 10.00.
Seanca do të zhvillohet në ambientet e Kolegjit të Posaçëm të Apelimit, në adresën: Bulevardi “Dëshmorët e Kombit”, nr.3. Tiranë./ Opinion.al E.Xh.
