Donald Trump ka kërkuar tashmë përfshirjen e Gjykatës së Lartë në ndalimin e procesit të numërimit të votave në Pensilvani.
Lajmi është bërë i ditur nga gazetarja e “Zëri i Amerikës” Kejda Kostreci, e cila u shpreh se publiku amerikan mbetet shumë i polarizuar pasi diferenca e votave mes dy kandidatëve është shumë e vogël.
“Fushata e zotit Trump ka dashur të fusë në lojë Gjykatën e Lartë lidhur me Pensivlaninë dhe ka bërë një kërkesë, që ajo të ndërhyjë lidhur me ndalimin e numërimit të votave. Në Pensilvani është lejuar të numërohen votat që kanë patur vulë kur janë hedhur në postë në datën e zgjedhjeve deri në 3 ditë më pas. Zoti Trump kishte kërkuar edhe më herët ndërhyrjen e Gjykatës së Lartë dhe një nga anëtarët e kësaj gjykate kishte thënë që do ta shohim më vonë këtë çështje, por tani ka ndryshuar balanca e gjykatës”, tha Kostreci duke pohuar se situata është po aq e ndarë sa edhe një ditë para zgjedhjeve.
“Pavarësisht se kush fiton, duke patur parasysh distancën shumë të vogël në ato shtetet që janë në fushë- betejë, tregon se publiku mbetet i polarizuar”, tha gazetarja duke shtuar se institucionet amerikane po e bëjnë punën e tyre ashtu siç duhet.
“Nëse ka një lajm të mirë është që institucionet amerikane po e kryejnë detyrën e tyre ashtu siç duhet ta kryejnë dhe sigurisht këto janë zgjedhje të jashtëzakonshme duke patur parasysh sasinë e madhe të votave që erdhi me postë”, u shpreh Kostreci./Opinion.al
