Grupe qytetarësh serbë bllokuan të mërkurën për pak kohë rrugën kryesore në Graçanicë afër Prishtinës, në shenjë proteste ndaj arrestimit të një pjesëtari të komunitetit serb, nën dyshimet për krime lufte.
Sipas një njoftimi të policisë së Kosovës i arrestuari, dyshohet se gjatë luftës si gardian në burgun e Lipjanit, rreth 20 kilometra në jug të Prishtinës, “në mënyrë sistematike, ka ushtruar torturë, dhunë fizike, psikike, keqtrajtime dhe maltretime çnjerëzore dhe të skajshme për jetën, ndaj të burgosurve shqiptarë”.
Protestues nga radhët e komunitetit serb në Graçanicë pralajmëruan protesta të reja për të enjten duke mohuar dyshimet mbi të arrestuarin.
Arrestimi ngjalli reagime të partive politike serbe në Kosovë dhe zyrës për Kosovën në qeverinë e Serbisë, që bënë thirrje për reagim të komunitetit ndërkombëtar.
Lista Serbe tha në një reagim se “Dragisha Milenkoviç është arrestuar në Graçanicë pa asnjë provë”, dhe se “regjimi i (kryeministrit Albin) Kurtit vazhdon gjuetinë mbi serbët para syve të komunitetit ndërkombëtar, i cili hesht dhe i jep hapësirë Kurtit për të përndjekur serbët, ndërsa EULEX-i pretendon të jetë një institut statistikor”.
Zyra për Kosovën në qeverinë serbe tha se arrestimi i sotëm “është një demonstrim brutal i forcës dhe padrejtësisë nga regjimi antiserb i Albin Kurtit”.
Zhvillimet në komunën e Graçanicës ndodhën në një kohë kur po bëhen gati një muaj që në veriun e Kosovës të banuar me shumicë serbe situata vazhdon të jetë e tensionuar. Grupe qytetarësh serbë po protestojnë duke kundërshtuar vendosjen në zyra komunale të kryetarëve shqiptarë të dalë nga zgjedhjet e 23 prillit, që u bojkotuan nga partitë politike serbe.
Diplomatët perëndimorë po bëjnë thirrje për uljen e tensioneve duke larguar nga zyrat kryetarët shqiptarë të komunave, njësitë e posaçme të policisë nga ndërtesat komunale dhe mbajtjen e zgjedhjeve të reja në veri të Kosovës.
Kryeministri i Kosovës, Albin Kurti tha të mërkurën se nuk mund të mbahen zgjedhjet në veri të vendit pa sundim të ligjit, që do të garantonte rezultat të ndershëm dhe demokratik ndërsa akuzoi presidentin serb Aleksandar Vuçiç për kriminalizimin e politikës në veri të Kosovës.
Ai i bëri këto komente përmes një video mesazhi drejtuar serbëve të Kosovës, ku nënvizoi se situata nuk është aspak e lehtë në veri të vendit dhe sipas tij, të gjithë kanë frikë nga ngjarje të paparashikueshme në të ardhmen e afërt.
“Për këtë kemi nevojë për zgjedhje të parakohshme dhe një fushatë të hapur, të lirë, parazgjedhore në 4 komuna në veri. Pa një fushatë të ndershme dhe demokratike, nuk ka zgjedhje të ndershme dhe demokratike. Dhe kjo është arsyeja pse në radhë të parë nevojitet sundimi i ligjit, pra një mjedis ku nuk ka frikë dhe kriminelë”, tha ai duke nënvizuar se me sundim të ligjit, gradualisht mund ta zvogëlohet numri i policëve në ndërtesat komunale.
Kryeministri Albin Kurti tha se ka nevojë për më shumë takime në Bruksel për zbatimin urgjent, të plotë dhe të pakushtëzuar të marrëveshjes së arritur në Bruksel dhe Ohër për normalizimin e marrëdhënieve.
Shefi i Politikës së Jashtme të Bashkimit Evropian, Josep Borrell, ka paralajmëruar një takim për këtë javë për menaxhimin e krizës ndërmjet kryeministrit të Kosovës, Albin Kurti dhe presidentit serb, Aleksandar Vuçiç.
“Ne kemi thënë mjaft sa i përket pritjeve tona, pasojave të mundshme dhe hapave. Çështja kryesore është të kemi takim këtu në Bruksel dhe në këtë moment, nuk jam në gjendje të konfirmoj ndonjë datë por është ende e mërkure dhe deri në fund të javës kemi edhe disa ditë por tash për tash nuk mund të konfirmoj asnjë datë apo kohë”, tha të mërkruën zëdhënësi i Bashkimit Evropian, Peter Stano.
Kryeministri i Kosovës Albin Kurti tha se është i gatshëm të marr pjesë në bisedime për të sqaruar siç tha gjetjet e institucioneve të vendit për arrestimin e policëve të Kosovës nga autoritetet serbe ndërsa presidenti serb Vuçiç tha të martën se “nuk do të bisedojë me zotin Kurti derisa të lirohet çdo serb u arrestuar në veri të Kosovës dhe të mos tërhiqen kryetarët shqiptarë të komunave veriore”.
Tensionet në mes të Kosovës dhe Serbisë u shtuan javën e kaluar pas ndalimit të tre policëve të Kosovës nga forcat serbe.
Diplomatët perëndimorë kanë shprehur shqetësimin për mundësinë e përshkallëzimit të situatës së sigurisë në një kohë kur as Kosova dhe as Serbia nuk kanë ndërmarr hapa për shtensionimin e situatës me gjithë thirrjet e tyre./ VOA
