Presidentja Vjosa Osmani pas certifikimit të rezultateve të zgjedhjeve është duke shikuar mundësitë për një datë të përshtatshme për të thirrur seancën e konstituimit të Kuvendit.
Pas konstituimit të Kuvendit pritet të rrjedhin edhe afatet kohore për formimin e qeverisë.
Nga LVV-ja që ka fituar 48 mandate nuk ka deklarata përveç atyre të mëhershme që do ta bëjnë qeverinë me komunitetet joserbe.
E Bedri Hamza nga PDK-ja tha se është i gatshëm që të marrë përgjegjësinë për krijimin e Qeverisë së Kosovës, nëse një gjë të tillë dështon ta bëj partia fituese.
Tha se janë duke zhvilluar bisedime me LDK-në, AAK-në dhe Nismën.
U pyet nëse është i gatshëm t’i lërë postin e kryeministrit LDK-së e cila e ka vënë këtë kusht për çdo marrëveshje eventuale për një koalicion të ardhshëm qeveritar.
Pavarësisht se tha se nuk ka vija të kuqe për asnjë parti, Hamza tha se preferon që të krijojë një ekzekutiv ku nuk do të ishte LVV-ja.
Një natë më parë në një intervistë televizive kreu i AAK-së Ramush Haradinaj tha se LDK-ja po e bllokon ‘Qeverinë e opozitës’.
Haradinaj i ka reaguar menjëherë kreu i LDK-së Lumir Abdixhiku i cili ka thënë se nëse partia e parë nuk mund të bëjë qeverinë, qëndrimet tona janë të qarta dhe LDK nuk ua bënë politikën askujt për qejf.
Tv Klan
