Shumica e punonjësve të administratës publike në Kosovë zhvilluan grevë njëorëshe duke kërkuar nga qeveria ndryshimin e ligjit për pagat. Një nga kryesuesit e këshillit grevist, Ali Sefaj tha se “ne presim që sot apo nesër që qeveria të reflektojë e ta ofrojë dokumentin zyrtar. Ne jemi që t’u shërbejmë qytetarëve mirëpo ky ligj bëhet për dhjetë vite. Ne nuk po kërkojmë paga ne po kërkojmë koeficientë që të kemi trajtim me dinjitet sot për dhjetë vitet tutje”, theksoi ai.
Sefaj tha se nëse qeveria nuk i merr parasysh kërkesat e tyre, greva do të zgjatet në kohë.
Ligji për pagat i cili është në fazën e shqyrtimit në parlament ka ngjallur pakënaqësi të shumta të punonjësve në sektorë të ndryshëm të cilët thonë se nuk janë trajtuar si duhet në këtë ligj.
Në grevë vazhdojnë të jenë prej 3 javësh dhe arsimtarët e shkollave fillore, të mesme dhe universitetet publike të Kosovës, të cilët kërkojnë nga qeveria që të ndryshohet ligji duke rritur normën e pagesës për të gjithë punonjësit e sistemit arsimor publik.
