Ministria e Shëndetësisë së Kosovës ka bërë të ditur se një pacient dyshohet se është i infektuar me Linë e Majmunëve.
Pacienti është hospitalizuar mbrëmë pranë Klinikës Infektive në Qendrën Klinike Universitare të Kosovës dhe momentalisht është në gjendje shëndetësore të qëndrueshme.
“Po vazhdon mbikëqyrja epidemiologjike e pacientit dhe gjurmimi i kontakteve. Mostra do të dërgohet në laboratorin referent të OBSh në Holandë, presim edhe rezultatet laboratorike deri në diagnozën përfundimtare sipas kritereve të parapara” thuhet në njoftimin e MSh-së.
Bëhet e ditur se pacienti rreth 70 vjeçar nga komuna e Dragashit është i izoluar.
“Ministria e Shëndetësisë dhe IKSHPK, njofton qytetarët e Republikës së Kosovës, se për çdo informacion të ri, opinioni publik do të informohet në kohë reale, dhe se situata është e qetë dhe stabile” thuhet mes tjerash në njoftim.
