Ka përfunduar takimi mes kreut të Vetëvendosjes Albin Kurti dhe atij të Partisë Demokratike të Kosovës, Memli Krasniqi. Takimin u zhvillua para përpjekjes së radhës për konstituimin e Kuvendit të Kosovës dhe ka zgjatur një orë.
Menjëherë pas këtij takimi ka reaguar edhe kreu PDK, Krasniqi i cili ka pohuar se i ka kërkuar Kurtit të mendojë për kandidatë të tjerë për kryeparlamentar.
“Kemi shkëmbyer ide dhe diskutime sa i përket konstitutimit të Kuvendit. Qëndrimet e Partisë Demokratike dhe të mijat janë ato që i dini. Atë që i kam thënë pas çdo dështimi të seancës, ia kam thënë z. Kurti përsëri”, është shprehur ai.
Gjithashtu, Krasniqi gjatë fjalës së tij është shprehur se është me rëndësi të zhbllokohet kjo situatë, të konstituohet Kuvendi.
Kreu i PDK-së ka bërë të ditur se i ka sugjeruar Kurtit të mendojë për kandidatë apo kandidatura të tjera për kryetar të Kuvendit.
“Ne nuk kemi pasur qëndrim mohues apo bllokues. Nuk na takon neve t’ia zgjedhim kandidatin për kryetar të Kuvendit partisë së parë. S’kemi marrëveshje politike”.
Ai ka thënë se partia e tij është e gatshme të votojë “një figurë që mund të jetë e pranueshme”. Sipas Krasniqit, nëse Kurti do që ta zhbllokojë situatën, duhet ta ndërrojë sot emrin e kandidatit për kryetar të Kuvendit.
